Sjriefsels zunt eigelek get waste sjriefs en doa is ging bepaalde moat vur. Dat kint e gedich zieë dat gaar neet rijmt of soms och ‘ns af en toe waal rijmt. Ich loat ’t an uch uvver wat d’r ’t leefste least. Vur te sjrieve mak ’t vur mich totaal niks oet.
Mèr ’t kin och geweun e verhoal zieë uvver ’n onderwerp woebie daste alling mèr dings an ’t sjun wear of an ’n ander alledaags nuujs wat dich toevallig te binne sjuut.
Ezoeë of ezoeë, an uch wat d’r ’t leukste vingt. Ich hub in idder geval hieël veul plezeer gehad mit ’t sjrieve van al die sjriefsels en hoop dat dat plezeer och bie uch kump es d’r ’t an ’t leaze zeut.
En zeut neet verwonderd es ich get ezoeë gesjreave hub wie dèr ’t neet zoudt sjrieve, ich sjrèf ’t wie ich dach dat ’t sjuus woar ezoeë wie ich va heim oet ’t Gulper plat gelierd hub.